इन्द्रजात्राको अवसरमा इन्द्र दह(सिद्धपोखरी)मा विहानै देखि भक्तजनहरु ठूलो घुइँचो

इन्द्रजात्राको अवसरमा भक्तपुरको धार्मिक तीर्थस्थलको रुपमा रहेको प्रसिद्ध प्राचीन इन्द्र दह (सिद्धपोखरी) मा विहानैदेखि ठूलो मेला लाग्ने गर्दछ ।
     
हरेक वर्ष इन्द्रजात्राका भोलिपल्ट आश्विन कृष्ण द्धितियाका दिन यहा ठूलो मेला लाग्ने गर्दछ । इन्द्र दह सिद्धपोखरीमा स्नान गरी इन्द्रायणी देवीको पुजाआजा गर्ने भक्तजनहरुको ठूलो घुइँचो लाग्ने गर्दछ ।

देवराज इन्द्रले स्नान गरेको दह हुनाले यस दिन इन्द्रदहको स्नान गरी इन्द्रायणी देवीको पुजाआरधना गरेमा पूण्यप्राप्ति साथै पारिवारिक सुःख समृद्धि मिल्ने जनविश्वास रहेको छ ।
     
हरेक वर्ष इन्द्रजात्राका दिन भक्तपुरको खौमा टोलस्थित इन्द्रायणी देवीको मूर्तिलाई खटमा राखी जात्रा गरेर सिद्धपोखरीमा ल्याई विराजमान गराई तान्त्रिक विधिपूर्वक पुजा र भोगवली चढाउने परम्परा रहेको छ । त्यसवेला परम्परागत बाजागाजाका साथ दाफा, भजन गाउने प्रचलन रहेको छ ।

सिद्धपोखरीमा लिच्छविकालदेखि मल्लकालसम्मका शैव, शक्ति, बौद्ध, वैष्णव, सम्प्रदायका देवी देवताका मूर्तिहरु छन् । अनावृष्टि हुदा सिद्धपोखरीमा आई वासुकी नागलाई पुजा गर्ने र जल वृष्टिका लागि तान्त्रिक पुजा गर्ने प्रचलन रहेको छ ।

पोखरीमा रहेको शिवलिङ्गमा जल चढाई पिएमा घाटी दुखेको रोग निको हुन्छ भन्ने जनविश्वास रहेको स्थानिय बुढापाकाहरु बताउने गर्दछन् ।